Muḥya - Winna yeddekkiren

 

Winna yeddekkiren - Tasfift tamezwarut n Muḥya - Meɣres 1979 - La statue - Jacques Brel

-------------------------------------------------------------------------------------

Tagi tura d winna yemmuten, i d-yekkren. Yenṭeq ɣer wigad akk i as-d-yezzin la ddekkiren fell-as ad t-id-tcekkiren imi yemmut ah lukan yedder ur t-id-tcekkiren ara. Yenna-yasen, ssusmet-aneɣ tura ciṭuḥ terẓam-d aqerruy-iw, d nnuba-w. Ad awen-d-dekkreɣ ciṭuḥ ula d nekkini. Ha-t-a wacu asen-d-yeqqar.

Yenna yas, a win iheddren fell-i
Nekk ɣur-i terreẓ cchada-k
Tessuliḍ-iyi s igenni
Yeqqim-d ala ayla-k
Ma yella tkemmel akkagi
Ɣas ṭṭef imi-k nniɣ-ak

Tenniḍ-as d bab n nnif,
lḥerma d lefhama
Argaz yettqeddimen lḥif
Yettxemmim i taggara
Nekni nttedu bessif
Acu i aɣ-yeǧǧan akka ?

Tenniḍ-as ur yettagad
D wigi i d izmawen-nni
D afeḥli yekkat zznad
Mi yekker adrar yeɣli
Nekni mi as-nesla terɛed
Ad nexmet seddaw tduli

Tenniḍ-as mi d-yeggull
Mi ak-id-yenna awal mačči sin
D bab n leɛqel d lmeɛqul
Di tidet i yesissin
Nekni a nnger-ik ay ul
Netturar di temqesin

Tenniḍ-as win d lmumen
Ur iḥeqqer ur yeṭṭellim
Rut a wid i d-yeqqimen
Ala ass-a mi tettwalim
Nekni nella d imcumen
Times-nneɣ seddaw walim

Tenniḍ-as d bu yimelyan
Am netta ḥedd ur yelli
Yeǧǧa-d amkan d azedgan
Deg wulawen ur iɣelli
Ma d nekk lliɣ d afuḥan
Am nekk am medden irkelli.