Arǧut - Lwennas Matub

 

Wissen ma tecfam-d i wass-nni, mi as-d-ssawlen ad ten-yefru. Ɛebban Remḍan mi yeɣli, ssut-is, yeddem-it waḍu. Ihi ass-a, yegzem umrar, ad d-iniɣ nekk wi yilan. Lekdeb ɣas ur yettwaffar, tuli-d zzit ɣef waman.

------------------------------------------------------------------------

Iṭij yekker-d ad ten-yefru
Yuẓa uksum s ajenwi
Yemudd lḥeq la yettru
Ma tecfam-d i wass-nni
Mi as-d-ssawlen ad ten-yefru
Ɛebban Remḍan mi yeɣli
Ssut-is, yeddem-it waḍu

Arǧut, arǧut
Arǧut ur ttruḥut ad twalim iɣsan
Iɣsan n wid ur nemmut !
Arǧut, arǧut
Ad twalim tamurt
Ffɣen-d yizerman si dduḥ n tmeṭṭut !

Yedda yid-sen
Nitni uɣalen-d
Ifassen urzen
Lqid yeǧhed
Di tregwa la yettazzal
La yettraǧu lḥal
Lḥal ad as-d-yefk nnuba
Isuḍ-d lbaṭel aderɣal
Ɛemmren-t-id d uzzal
Imdanen ur ten-yezgil ara
Am ccetwa, am uzal
Nerbeḥ-d ufal
Am wakken terra tmara

Yekfa wawal
Lehna ur d-tḍal
Mi truḥ teḍṣa
Wissen ma ad d-tuɣal

Iṭij mi d-yerǧem tamurt
Yeggul ur s-yettaxer ara
Ageffur, dayen nettu-t
Γaben waman di tliwa
Igenni mi s-d-saḥ tagut
Ssxeḍ ur d-yeǧǧi acemma
Qqaren "Ayen ifaten yemmut"
Ma d nekk ur umineɣ ara

Arǧut, arǧut,
Arǧut ur ttruḥut ad twalim iɣsan
Iɣsan n wid ur nemmut !
Arǧut, arǧut
Ad twalim tamurt
Ffɣen-d yizerman si dduḥ n tmeṭṭut !

Ibuεemmaren
Mcawaren
Adrar yenhed
Raḥen idammen
Uzzu mi t-ɣummen s leḥrir
Yewweḍ-iten-id uxbir
Di Lmerruk d acu isaṛen
Yuɣ-d lḥerma n jjir
Γas daxel n uɣbir
Iẓuran-is ma ad beddlen ma ad beddlen
Aɣyul irkeb-it lḥir
Mi yesla i zzhir
S atemmu yedhem yekcem yedhem yekcem

Iɣil yeffer,
Ḥedd ur t-iẓar
Mi t-id-leḥqen
Yebda icexxer

Raḥen idammen di tɣummar
Raḥen deg umadaɣ n zzan
Teǧǧa-d taluft, tisigar
D leεyub d-sḍehren wussan
Ihi ass-a, yegzem umrar
Ad d-iniɣ nekk wi yilan
Lekdeb ɣas ur yettwaffar
Tuli-d zzit ɣef waman

Arǧut, arǧut,
Arǧut ur ttruḥut ad twalim iɣsan
Iɣsan n wid ur nemmut !
Arǧut, arǧut,
Ad twalim tamurt …
Ffɣen-d yizerman si dduḥ n tmeṭṭut !