Asenǧaq n yimaziɣen

Am yirgazen am tlawin, nɛemmed ad negrent tudrin wala ad yenger lasel. Asenǧaq-a d wayen yettgensis i d taɣẓint n tudert-nneɣ. Amenuɣ yettkemmil ! Asenǧaq neɣ acenyal n yimaziɣen deg-s kraḍ n yisura iglawanen yesɛan yiwet n tehri (azegzaw, aḥcayci, awraɣ) d usekkil Z (yaz s tfinaɣ) s uzeggaɣ. Yesnulfa-t-id Ugraw n Yimaziɣen deg useggas n 1970...

Yal ini yettbeggin-d yiwen seg yiferdisen n Tmazɣa, tamurt n yimaziɣen (tafriqt ugafa) :
- azegzaw yeqqen ɣer yilel agrakal d ugaraw atlantiki ;
- aḥcayci yeqqen ɣer tgama d yidurar ;
- awraɣ yeqqen ɣer yijdi n unezruf n ssaḥra.
- Asekkil aza neɣ yaz n ugemmay n tfinaɣ deg tlemmast s uzeggaɣ, d azamul n urgaz illeli amaziɣ. Ini n tudert maca d yini n uzbu daɣen.

Ayagi iccud daɣen ɣet Tenfalit n ugdud amaziɣ : Akal, Awal, Afgan 

Ass n 30 ɣuct 1997, deg temlilit tameqrant n Ugraw Amaḍlan Amaziɣ i d-yellan deg tegzirin Tikanariyin, msefhamen yimaziɣen ɣef usenǧaq-nsen. Seg wass-nni ttawint yimaziɣen deg tmesbaniyin, deg tmeɣriwin, deg leqdic ɣef yidles, ttawint daɣen yimeɣnasen n tmaziɣt… Merra imaziɣen ferḥen yernu ttzuxxun syes anda ma ddan anda ma llan.

Asenǧaq-agi d azamul, d ayen i d-yesdukklen imaziɣen n yal tmura. Syes i aɣ-ẓran medden, syes i aɣ-ssnen medden d syes i d-nban gar yegduden. Ass-a, ilaq ad as-nerr tajmilt i usenǧaq-nneɣ. Yal ass n 30 ɣuct, am ass ideg i d-illul deg Tafira deg tegzirin Tikanariyin.

Yal amaziɣ ilaq-as ass-a, ad yilli ɣur-s ma ulac yiwen usenǧaq amaziɣ deg uxxam-ines neɣ deg taddart-ines. Ilaq yal amaziɣ ad as-yerr tajmilt i usenǧaq n yimaziɣen ass n 30 ɣuct, ad yilli d taɣawsa i aɣ-d-yesmektayen idles-nneɣ, awal-nneɣ, tilleli-nneɣ, akal-nneɣ.

Ass n usenǧaq amaziɣ, d ass umaziɣ. Tudert i usenǧaq n yimaziɣen ! Tudert i Tmazɣa.