Asenfar Pegasus

« Pegasus » d isem alatini n uɛudiw bu wafriwen n tesnimeyt tagrikit. D isem i ittunefken i useɣẓan aɣalli ineṭṭegen isawalen imegza n ufus seddaw yinagrawen « iOS » d « Android ».... G.M. : Iswi amezwaru n umagrad-a d taywalt s tmaziɣt ɣef yisental imiranen.

Aseɣẓan-a d amihaw ugar ɣef wiyaḍ imi yezmer ad yali deg usawal war ma tella-d tigawt sɣur bab-is « zero-click ».

D aseɣẓan i d-tesnulfa d teznuzuy seg 2013 termist tisrayilit « NSO Group ». Mi ara yers deg usawal, yezmer ad yaweḍ ɣer yifuyla, iznan, tiwlafin, awalen n uɛeddi… Yezmer daɣen ad isel i teɣriwin, ad iseqdec asekles ameslaw, takamra d ad yeḍfer asideg arakal. Faqen-as i tikkelt tamezwarut deg 2016.

S tɣara tunsibt, aseɣẓan-a znuzuyen-t kan i tuddsiwin tiwankanin i usnuḍef n yimdanen yesɛan assaɣ d tremɣa neɣ d yinɣayen irumsiden. Maca s tɣara tumrist, seqdacen-t kra n yinhilen i usnuḍef n yineɣmasen, imnamaren isertiyen d yimeɣnasen n yizerfan n umdan.

Deg yulyu 2021, tella-d yiwet n tsestant s yisem « Asenfar Pegasus » sɣur ugraw n yineɣmasen  « Forbidden Stories » s tallalt n « Amnesty International » d yiɣmisen « Le Monde - The Guardian - The Washington Post … » i d-ibeggnen belli azal n 11 n tmura i iseqdacen aseɣẓan-a i yiswiyen isertanen ladɣa i usnuḍef n yimnamaren, imeɣnasen, ineɣmasen d yinezzurfa.

Gar 50 000 n yisawalen iɣef d-tella tsestant, ufan-d azal n 180 n yineɣmasen, 85 n yimeɣnasen n yizerfan n umdan, 65 n yisenmaden n termisin d  600 n tugniwin tisertanin gar-asent aṭas n yiɣellaten n uwanak.

Deg Lezzayer, ugar n 6000 n yisawalen i iḥuza Pegasus. Gar-asen wid n tugniwin tisertanin, irgazen n yiwezla, imesnassayen d tugniwin n tmetti taɣarimt.

Taluft-a urɛad d-tefka merra ayen teffer sdaxel-is.

----------------------------------

Aseɣẓan : logiciel ; Tasnimeyt : mythologie ; Aɣalli : espion ; Nṭeg : attaquer ; Isawalen imegza : smartphones ; Inagrawen : systèmes ; Tarmist : entreprise ; Ifuyla : fichiers ; Iznan : messages ; Tiwlafin : photos ; Awalen n uɛeddi : mots de passe ; Tiɣriwin : appels ; Asekles ameslaw : enregistrement audio ; Takamra : caméra ; Asideg arakal : géolocalisation ; Amihaw : dangereux ; Tuddsiwin tiwankanin : organisations étatiques ; Taremɣa : terrorisme ; Asnuḍef : surveillance ;  Assaɣ : lien ; Inɣayen irumsiden : crimes graves ; S tɣara tumrist : dans la pratique ; Inhilen : régimes ; Imnamaren : opposants ; Tasestant : enquête ; Asenfar : projet ; Iwunak : états ; Inezzurfa : juges ; Isenmaden n termisin : dirigeants d’entreprises ; Tugniwin tisertanin : personnalités politiques ; Iɣellaten n uwanak : chefs d’état ; Irgazen n yiwezla : hommes d’affaires ; Imesnassayen : diplomates ; Timetti taɣarimt : société civile.