netoops blog
>>> Bienvenue ! Ansuf Yis-wen ! ⴰⵏⵙⵓⴼ ⵢⵉⵙ-ⵡⴻⵏ <<< Tamaziɣt, tella, ad-tili, ass-a, azekka... i-lebda ! <<< Deg webrid n Dda Lmulud, negzem (awi yufan ad tilim s-yidis-nneɣ) macci kan ad-neḥrez tutlayt d wedles n yimaziɣen s umata maca aten-nesnerni.
I kečč a Lwennas. Mara ṭṭlam yesseblaɛ tafat s uslifeẓ n ticurkeḍt d nḥeddeṛ s terẓeg i uleqqem imciṭen n tmagit tagimseggast, syin amyi yettuɣal d tilawt. Imcumen-agi tteḥqaren-aɣ yal taswiɛt. Nugi aneknu. Aleqqem yugi ad yaɣ segmi iɛuraf ṭerḍiqen s urured n tuddert yettwaxnaqen. Ur nesteɛfuy ara alama nedder d yiman-nneɣ d ḥebsen imerawen-nneɣ aneqleb deg iẓẓekwan-nsen. Tabawt tesfqaɛ-aɣ alama teglad s lmut. Tinififtin n ẓẓif-nneɣ ttwamerretent. Maɛtub Lwennas, tcennuḍ s ubeɛzeq ayen ḥulfan atmaten-ik s tsusmi. Immi nella d tiɣtas n yiwen unagraw anda awal tilleli yesɛa anamek : tilleli i wabɛaḍ ad melken wiyaḍ. Kečč d aselɣar i wul yettwarzen. D anza yeddren n lebɣi-nneɣ ad neqqim nbedd. Ccna yekkad seg ẓẓif-inek, taɣuct-ik i icuffen s zzɛaf d wurfan teseḥmay-aɣ iɣsan. ---------- Nettxayal Tawes Amruc d umeṭṭraḍ anumidi mi tzegger igenwan n tmurt-nneɣ. Syin akin ticraḍ n tyemmatin-nneɣ ttuɣalent d tidet tamagdezt. Ulac ayen nniḍen yessnen neɣ izemren aɣ-yenher. Lwennas, tesmektiḍ-aɣ-d s tumert belli ɣas uzlen idamen, aẓar yettwaxlaf. Ulac alugen n ugama yugaren wagi. Aḥaweṣ n tlelli-nneɣ sɣur imesḥaf-agi i-ɣ-iḥekmen yerra aɣref-nneɣ amzun ttaqeḍɛit n lmal yuḍnen anda wid iffazen ɛaṛqen, ussafen neɣ ttwarnan, wid menwala uɣen taggamaḍt n yitran yettcririqen. Rru a yul. Ccnu-yasen a Lwennas belli tugdut d aram amezwaru deg imawen-nneɣ, neṭṭḍitt seg yidmaren n tyemmatin-nneɣ. Ccnu-yasen fud-nneɣ n teɣdemt d weɣram. Ccnu, a Lwennas, ccnu ! Ɛni amedyaz yezmer ad yemet ?

lundi 13 mars 2017

Doctorat Honoris Causa i At Mengellat d Maɛtub


Ɣef wakken i d-yenna yimḍebber amezwaru n tesdawit n Tizi Uzzu, Mass Tessa, ad tettunefk cciɛa Doctorat Honoris Causa i yicennayen Lounis Ait menguellet
akked Lounes Matoub, deg useggas-agi 2017.
''Gar-aɣ d kra n lweqt, ad d-nheggi yiwet n temlilit d yinaẓuren anda ara d-yawi Ait Menguellet awal ɣef umecwar-is merra. Dinna ara nfares tagnit i wakken ad
as-nefk Doctorat Honoris Causa i unaẓur-agi-nneɣ ameqqran. Ma d tin n Matoub Lounes, ad tili deg taggara n useggas-a deg-i nella'', akka i d-yenna Mass Tessa assnni mi tebda temlilit tussnant ɣef umecwar n Ait Menguellet, i d-yellan deg tesdawit Lmulud At Mɛemmer n Tizi Uzzu, ussan n 6, 7 d 8 deg meɣres 2017. 


Timilit tagraɣlant iwumi fkan asentel ''Lewnis At Mangellat : 50 n yiseggasen n usnulfu. Timuɣliwin ɣef wazal n tmedyazt-is i tutlayt d tsekla d yidles'', i yellan d taslaḍt ɣef tmedyazt n ucennay ameqqran. deg temlilit-a, aṭas n yisaragen i d-wwin yiselmaden n tesdawiyin ɣef tmedyazt n ucennay-agi ameqqran, ad nebder Pr Tigziri, Pr Mohand Akli Salhi, Mohand Akli Haddadou, Sadi kaci, Amar Nabti n tesdawit n Tizi Uzzu. Lahoucine Bouaakoubi n tesdawit n Agadir deg Maruk, Thiziri Bachir n tesdwit n Lezzayer tamanaɣt. Yahia Sadouni n tesdawit n Tubiret. Habib Hami n tesdawit n Bgayet…atg. Awal yezzi s umata ɣef uzɣan aseklan n tmedyazt n Lewnis At Mengellat, idles d tgemmi deg tmedyazt n Lewnis, tazrawt n tutlayt deg tmedyazt n unaẓur-a, tazrawt taḍrisant d yinaw deg tmedyazt n Lewnis, asuɣel deg tmedyazt n Lewnis akked teslaḍt n uɣanib deg tmedyazt n ucennay-agi.


Seg tama-nniḍen, ur d-llin ara yisaragen i d-tewwi ad xedmen niqal yisdawenen-agi : Said Chemakh, Hacène Hireche akked Tassadit Yacine. Ɣef wakken i aɣ-d-yenna Said Chemkh, d netta s timmad-is i ijebden iman-is deg temlilit-a. Ma d sin-nni-nniḍen, ur yelli kra n ssebba i dibanen ar tura. I usmekti, yella-d, yakan, usuter deg tesdawit n Tizi Uzzu i wakken ad as-tefk Doctorat Honoris Causa i Lewnis At Mengellat deg temlilit-a.
Meɛna ayagi ur d-yelli ara imi ulac-it deg wahil n temlilit asmi i t-xedmen, akka i aɣ-d-tenna Pr Tigziri mi ttnesteqsa. Asuter-agi, yella-d ɣef uqerruy-is Mass Chemakh, aselmad des tesdawit n Tizi Uzzu.

Hocine Moula - Aɣmis n yimaziɣen

Aucun commentaire :

Enregistrer un commentaire