I kečč a Lwennas.

Mi ara yesseblaɛ ṭṭlam tafat s uslifeẓ n ticurkeḍt d nḥeddeṛ s terẓeg i uleqqem imciṭen n tmagit tagimseggast, syin amyi yettuɣal d tilawt. Imcumen-agi tteḥqaren-aɣ yal taswiɛt. Nugi ad neknu. Aleqqem yugi ad yaɣ segmi iɛuraf ṭerḍiqen s urured n tudert yettwaxnaqen...

Ur nesteɛfuy ara alamma nedder d yiman-nneɣ d ḥebsen imerawen-nneɣ aneqleb deg yiẓekwan-nsen. Tibawt tessefqaɛ-aɣ alamma tegla-d s lmut. Tinififtin n ẓẓif-nneɣ ttwamerrtent.

Matub Lwennas, tcennuḍ s ubeɛzeq ayen ḥulfan watmaten-ik s tsusmi. Imi nella d tiɣtas n yiwen n unagraw anda anamek n tlleli d tilleli i kra ad melken wiyiḍ.

Kečč d aselɣar i wul yettwarzen. D anza yeddren n lebɣi-nneɣ iwakken ad nezg nbedd. Ccna yekka-d seg ẓẓif-inek, taɣuct-ik i icuffen s zzɛaf d wurfan teseḥmay-aɣ iɣsan.

Nettxayal Ṭawes Amruc d umeṭṭraḍ anumidi mi tzegger igenwan n tmurt-nneɣ. Syin akin ticraḍ n tyemmatin-nneɣ ttuɣalent d tidet tamagdezt. Ulac ayen nniḍen yessnen neɣ izemren ad aɣ-yenher.

Lwennas, tesmektiḍ-aɣ-d s tumert belli ɣas uzlen idamen, aẓar yettwaxlaf. Ulac alugen n ugama yugaren wagi.

Aḥwaṣ n tlelli-nneɣ sɣur yimesḥaf-agi i aɣ-iḥekmen yerra aɣref-nneɣ amzun d taqeḍɛit n lmal yuḍnen anda wid ifazen ɛeṛqen, ussafen neɣ ttwarnan, wid menwala uɣen taggamaḍt n yitran yettcririqen. Rru ay ul.

Ccnu-yasen a Lwennas belli tugdut d aram amezwaru deg yimawen-nneɣ, neṭṭeḍ-itt-id seg yidmaren n tyemmatin-nneɣ.

 
Ccnu-yasen fud-nneɣ n teɣdemt d uɣram. Ccnu, a Lwennas, ccnu ! Amedyaz yezmer ad yemmet ?