Ḥku-yi-d Lwennas !

D tidet, Lwennas Matub d aselɣar i wul yettwarzen. Gar wayen i d-ḥekkun fell-as : 👉 Matub d yidlisen 👉 Matub d waman n lbir 👉 Matub deg wass lɛid 👉 Matub d yiselman

👉Matub d yidlisen.

Ɣef wakken i d-nnan, seg zik, iḥemmel Matub ad iɣer. Ihi, yiwen wass, yemlal deg lǧanaza akked Achour Ourrad (d netta i tt-id-yeḥkan). Yuɣ lḥal, argaz-a yesnaɣ-as tannumi yettawi-d idlisen mi ara d-yali ɣer taddart. Mi d-yewweḍ winna ɣer lǧanaza, yuɣ lḥal teqqes-it tɣirdemt. Medden akk lhan-d deg umekkan-nni n tuqsa, Matub yettḥewwis lǧiban-is ma yella kra n udlis.

👉Matub d waman n lbir.

Yesɛa Matub lbir deg uxxam-is. Seg wakken ttxassan waman deg taddart, yebna tala i wat taddart u yessalay-as-d aman seg lbir-nni. Ttasen-d ttagmen. Yiwet n tikkelt mi d-ileḥḥu s axxam, yemmuger-d tilawin uɣalent-d mebla ma wwint-d aman. Yesteqsatent ɣef sebba. Nnant-as-d : "la d-teqqar yemma-k, yeqqur lbir-nni". Mi yewweḍ s axxam, yufa yemma-s la tettess tamazirt s waman n lbir-nni. Seg zɛef-nni, yekker yerkeḍ-as akk tibḥirt-is. 

👉Matub deg wass lɛid.

Iruḥ Matub ɣer tejmaɛt deg wass n lɛid, yufa-n din yiwen urgaz yeqqim weḥd-s. Dɣa, yenna-as Matub :’’nekk aql-i da axater weḥd-i i lliɣ, i kečč, acuɣer mačči deg uxxam-ik i telliḍ, ɣer warraw-ik ass-agi n lɛid ?’’ yerra-as-d winna :’’ad ak-iniɣ kan ṣṣaḥ, setḥaɣ ad qableɣ tawacult-iw imi ur zmireɣ ara ad d-aɣeɣ ikerri n lɛid’’. Yuɣ lḥal, Matoub, yesɛa ikerri deg uxxam. Din, din, iruḥ yewwi-as-tid. 

👉Matub d yiselman.

Yiwen wass, iruḥ ad d-yaɣ iselman deg taddart. Mi yewweḍ, yenna-as i winna yesnuzun iselman ad as-dyefk arḍel (azgen n kilu). Mi i as-t-id-yefka, yessegra-as-d awal winna, yenna-as : ’’Matub s timmad-is, yewwi kan arḍel’’. Yuɣ lḥal, yefka-as Matub 1000 idinaren. Mi iruḥ ad as-d-yerr ṣserf, yenna-as Matub : ‘’aɣ-d yis-sen lefhama’’.