AMCALAY DELṬA

Amcalay Delṭa n unfafad bu tesmert 19 neɣ B.1.617.2, yettwassnen uqbel s yisem « Amcalay Ahendi », yegla-d s unezgum i yimdanen merra… G.M. : Iswi amezwaru n umagrad-a d taywalt s tmaziɣt ɣef yisental imiranen.

Ansi i d-yekka ?

• Amcalay Delṭa ufan-t i tikkelt tamezwarut ɣer taggara n useggas 2020 deg tmurt n Lhend anda yelḥa s waṭas.
• Ass-a yewweḍ ɣer wugar n 85 n tmura deg umaḍal akken d-tenna Tuddsa Tamaḍlant n Tdawsa (OMS).
• Sya ar taggara n ɣuct, yezmer ad yaweḍ ar 90% n tejra (lḥalat).

Deg wacu i yemgarrad ?

• Amcalay Delṭa yesɛa aṭas n tḍermisin, kra deg-sent llant yakan deg yimcalayen-nniḍen.
• Tiḍermisin-a ttaǧǧant ad icudd s tefses ɣer tebriqin d ad yemneɛ seg unagraw amḥadi.
• Am yimcalayen-nniḍen, igellu-d s uqraḥ n uqerruy, tussut, aqraḥ n tgerjumt d tazzla n wanzaren.

Ma yella d amihaw ugar ?

• Amcalay Delṭa yettenṭaḍ ugar n umcalay Alfa s watug n 40% ar 60%, i ineṭṭḍen netta yakan ugar n unfafad anasli s watug n 50%.
• Aṭas n yimdanen ara iḥaz umcalay-a ilaq-asen ussegnef.

Ma yezmer ad yengeẓwer i tgezzayt ?

• Tamellit n tgezzayin mgal amcalay Delṭa tneɣɣes. Tegda 88% s Pfizer akked 60% s AstraZeneca s snat n tukfiwin mgal talɣiwin yesɛan isɣalen.
• Maca tigezzayin-a di snat zgant d timellilin s wugar n 92% mgal assegnef.

Ma yella ad d-yeglu s tayyugt tamaynut ?

• Anfafad iteddu s tuget gar yimdanen ur necriḍ ara.
• Ugur ameqqran ad yili deg tefriqt d temrikt n wanẓul anda ur d-yelli ara ucraḍ s waṭas.
• Daymi merra timura ttnadint amek ara cerḍen amur ameqqran seg yiɣerfan-nsent.
• Anfafad bu tesmert ad yissin tiḍermisin-nniḍen yeggten…
• Ttmeslayen yakan ɣef Umcalay Delṭa Yennernan deg tmurt n Lhend.

Aɣbalu : FuturaSante

----------------------------

Amcalay : variant ; Anfafad bu tesmert : coronavirus ; Tuddsa Tamaḍlant n Tdawsa : Organisation Mondiale de la Santé ; Tejra : cas ; Tiḍermisin : mutations ; Tibriqin : Cellules ; Anagraw amḥadi : système immunitaire ; Atug : taux ; Assegnef : hospitalisation ; Tagezzayt : vaccin ; Tamellit : efficacité ; Tukfiwin : doses ; Isɣalen : symptômes ; Timellilin : éfficaces ; Tayyugt : vague.