Awalen imyuɣalen (Palindromes)

D acu-t wassaɣ yellan gar wawalen-a : Ihi – Nessen – Tiririt ? Ur wehhmet ara, ih yella wassaɣ gar-asen ...

D tawnafit n tutlayt, d tunuɣt n uɣanib.  Awalen s tewnafit-a llan qrib deg merra tutlayin. War ma nudaɣ aṭas, ufiɣ-d belli ggten deg tmaziɣt.

Tabadut

« Palindrome » d awal, d tafyirt neɣ d amḍan i nezmer ad nɣer seg yeffus d zelmeḍ s yiwen unamek. Ur nettak ara azal i usigez.

Awal « Palindrome » yekka-d seg tegrikit, deg-s sin n wawalen. « Palin » anamek-ines « ɣer deffir » d « dromos » s unamek « abrid ».

Isem-is s tmaziɣt 

Ur ufiɣ ara awal « Palindrome » deg yimawalen n tmaziɣt. Awalen i t-iqerben : 

• « Tamendeffirt », tuɣalin ɣer deffir maca mačči s wudem, s uɛrur. 
• « Amyuɣal », yezmer ad iɛiwed iman-is seg tnila timittit. 

Ferneɣ-d aseqdec n « wamal amyuɣal ».

Ayɣer i ten-nesseqdac ?

Aseqdec-nsen deg tira d urar aseklan aqbur, yettbeggin-d tiḥerci n umaru deg usemres n yisekkilen, n wawalen d tefyar yerna ttaran taɣuri telha ugar. Seg tama-nniḍen, ttaǧan amaru d umeɣri ad sqedcen alaɣen-nsen deg sin.  

Wid i ten-iḥemmlen zgan tteɛraḍen ad afen wid ɣezzifen ɣef wid yellan yakan. 

Amḍan yezmer daɣen ad yili d amḍan amyuɣal. Amedya : 12.02.2021 d ass amyuɣal. Isemawen n tuddar, timdinin : Tililit (Ɛin lḥamam - Tizi Uzzu), Tit (Adrar d Tmenɣest), Demmed (Ǧelfa).

Deg tefransist

Awal ɣezzifen ugar deg-s tẓa (09) n yisekkilen : « Ressasser ». 

Gar Tefyar yettwassnen ugar : 

« Engage le jeu que je le gagne. »,

« Ésope reste ici et se repose. ».

Deg tmaziɣt

Awal ɣezzifen ugar i d-ufiɣ deg-s sa (07) n yisekkilen : « Tiririt ». Wissen ma yella tesnem win i t-yugaren ?

Kraḍ n yisekkilen

Ili, ala, ihi, ini, iɣi, izi, imi, ama, ara, aya, usu, uhu, sus, bab

Kuẓẓ n yisekkilen

Uzzu, adda, akka, aqqa, arra

Semmus n yisekkilen

Tafat, tegget, tewwet, tissit, anina, iriri, aḥiḥa

Sḍis n yisekkilen

Nessen, tiqqit

Sa n yisekkilen

Tiririt

Kra n tefyar : 

Aru tura.

Arut tura.

Wali uzzu ilaw.

S ufus.

Ad tegget da.

Ad tewwet da.

Akka iyi-tewwet, tewwet-iyi akka.

Isem da d Mesi.

Allal n lalla.

Cukkeɣ d tikkelt tamezwarut ara d-yili leqdic ɣef usentel-a deg tmaziɣt. Ma yella yeɛǧeb-awen, atan ihi wawal ɣur-wen !

-------------------------------------------------------

Awal amyuɣal : palindrome ; Amyuɣal : réversible ; Assaɣ : lien ; Tawnafit : curiosité ; Tunuɣt n uɣanib : figure de style ; Asigez : ponctuation ; Tanila : sens ; Timittit : inversée ; Uzzu : mal ; Arra : acte ; Ilaw : réel