Tasleḍt n unasiw n Tmaziɣt

Anasiw n tmaziɣt i Windows i d-yefka Usqamu Unnig n Timmuzɣa yelha yerna yemmed. Nezmer ad naru yes-s merra tutlayin i yettwarun s yisekkilen n tlatinit war ma nbeddel anasiw. Nekk, ttaruɣ seg tazwara yes-s war ugur.  Anasiw-a yesseqdac taqeffalt tibawt « ^ ¨ » iwakken ad yernu isekkilen imaẓlayen n tmaziɣt. Yeṣhel maḍi iwakken ad necfu ɣef yimukan n yisekkilen. Yessefk kan ad necfu belli ^+q ad d-yefk ɣ, ^+w ad d-yefk ɛ. Isekkilen-nniden tekken-d seg yisekkilen i ten-yecban...

Llan deg-s ula d isekkilen ţ d Ţ ɣas akken ur ten-neḥwaǧ ara imi yessefk ad neḍfer ilugan n tira ineggura, iɣef msefhamen imusnawen n tutlayt, yellan deg yiɣerbazen d tesdawiyin. Imesli [ts] ad t-naru s usiknew n usekkil t. Deg taggara n wawal, ad naru yiwen n t kan. Ur nettarra ara daɣen azal deg tira i tenɣit acku u tesɛi ara azal asnislan.

Tisenfal tilatiniyin n yisekkilen n tegrikit « epsilon d gamma (ɛ Ɛ ɣ Ɣ) » mgarradent ladɣa deg yisekkilen imeqqranen d yisekkilen n tegrikit n tidet (ε Ε γ Γ). Ur ṣɛan ara yiwet n tengalt. Yessefk daɣen ad nissin belli Σ d asekkil ameqqran n usekkil n tegrikit « sigma σ ».

Isem n usekkil	Tisenfal tilatiniyin		Tagrikit n tidet
	Amecṭuḥ	Ameqqran	Amecṭuḥ	Ameqqran
Gamma	ɣ	Ɣ	γ	Γ
Epsilon	ɛ	Ɛ	ε	Ε
Sigma			σ	Σ

• Isekkilen n ugemmay alatini n uzadur llan deg umazrar « Controls and Basic Latin », tingalin seg 0000 ar 07F. 

• Isekkilen č, Č, ţ akked Ţ ddan-d deg tdugrumma « Latin Extended-A », tingalin seg 0100 ar 017F. 

• Isekkilen ǧ, Ǧ, Ɣ akked Ɛ ddan-d deg tdugrumma « Latin Extended-B », tingalin seg 0180 ar 024F. 

• Isekkilen ɣ akked ɛ llan deg « IPA Extensions », seg 0250 ar 02AF. 

• Isekkilen ḍ, ẓ, ṛ, ṭ, ṣ, ḥ, Ḍ, Ẓ, Ṛ, Ṭ, Ṣ akked Ḥ ad ten-naf deg umazrar « Latin Extended Additional » seg 1E00 ar 1EFF.

Aheggi d usbeddi n unasiw mačči d ayen yuɛren, yezmer-asen ula d win ur yellan ara d asenselkam am nekk. Microsoft yefka-d aseɣẓan baṭel i waya. Aseɣẓan isem-is Microsoft Keyboard Layout Creator.

Tansa-ines d ta : https://www.microsoft.com/en-us/download/details.aspx?id=102134. 

Yella daɣen useɣẓan « kbdedit » yifen wagi maca mačci baṭel. 

Nekkini ur ufiɣ ara ayen ara bedleɣ deg-s neɣ ayen ara d-rnuɣ i unasiw i d-yefka Usqamu Unnig n Timmuzɣa.  Zedmen-t yinerza 12495 n tikkal seg Tala uMaziɣ http://adrar-inu.blogspot.com/2015/04/un-pilote-de-clavier-pour-ecrire.html.