Anẓar : Un rite ancestral d’obtention de la pluie

Anẓar d agellid n ugeffur (lehwa, aman). Qaren belli yebɣa ad yaɣ yiwet teqcict icebḥen am aggur yufa teccucuf deg asif, aman-is ṛeqqen. Maca, taqcict nni tuggi tena-yas ugadeɣ imennan. Yerfa ugellid nni n waman, yebren taxatemt-is, dɣa yeqqur wasif nni, yeɣlid aɣurar ɣef yakk tmurt.  Agellid yeǧǧa Taqcict tettiɣwis, tetru, tetru, tessawal ar igenni. Dɣa cwit kan akka twala ifettiwej d ameqqran, yeqqled ugellid nni n lehwa. Iger taqcict nni g iri-is. Asif nni yeqqel akken yella, tzegzew akk tmurt. Dɣa teqqim-ed akken ttanumi. Ticki yemmeɣ uɣurar ad nebder mebla leɛḍil Anẓar.

Téléchargez le Poster éducatif Amazigh - Anẓar - PDF

Mi ara tnezruref tmurt, yemmeɣ uɣurar, ad beddent tlawin, zik ad muqlent taqcict ttilemẓit i cebḥen, tin yebbḍen tizi n zzwaǧ. As qqnent lḥenni, as selsen-t lfeṭṭa, ad ttwejden-t amzun tislit. Aɣenǧa deg ufus-is. Ma ttura kksen medden taqcict, dɣa tcebbiḥen kan i uɣenǧa as weqmen allen, aqemmuc, as sburen s leḥrir, as qnen tafzimt am akken ttaqcict-nni n zik. Aɣenǧa-yagi qqaren-as tislit n wenẓar. 

Dɣa ad ffɣent tlawin d uɣenǧa d warrac, ad zzin i tudrin merra ad tteddun ccenun Anẓar, anẓar … s teɣratin. 

Ansi kkan lɣaci-yagi, amsegli yettimɣur ttirni, asen d-fken medden awren, aksum, acedluḥ, lebsel, zzit, lmelh… At wexxam ɣef ara ɛeddin asen d-ḍeggren aman ɣef uqqerruy, yerna kkaten ad leḥqen tislit-nni. 

Mi bbḍent tlawin-nni ar lemqam neɣ lǧameɛ, ad sersent tislit-nni. Ad kkrent tlawin ad sebbent akk ayen id ḥawsent. Imi ttcan akk wid d yeddan ar dinna, ad d-ezzin s teslit-nni sebɛa tikal i ljameɛ ad d-eṭfen aɣenǧa-nni aqerruy-is ad yezwir ar zdat am akken ara ḍelben aman. 

Syin akkin ad kkrent kra teḥdayin yellan ɣef tizi n zzwaǧ s teslit-nni ad urarent zerzari s txennact iferki. Ad nejmaɛent anda tella luḍa zdat lǧameɛ neɣ lemqam. Ad tfent iɛewzan, kul yiwet s yiwen uɛakkaz. Ad tfent taryalt iferki, ta attekkes taxnact i ta. Ad idum wurar-nni alama tekcem txennact-nni ar uxemmuj i s-heggant.

Taxennact iferki i s-urarent zerzari neṭṭlen-tt daxel uxemmuj i s-ɣezen yakan weqbel urar. Ad uɣalent tlawin-nni merra ar taddart weqbel ad yeɣli iṭij. Qaren belli tekkated lehwa kra n wussan deffir asfel n wenẓar.