Lqem aneggaru n unasiw « Gboard » n Google ɣef usawal n ufus seddaw Android d IOS yefka-d abeḥri i turin n yimaziɣen merra imi i d-isedda Tamɛemrit d Tifinaɣ...

Ɣas aṭas-aya ay nerǧa, ass-a yeffeɣ leɛtab-nneɣ ɣer tafat. Agmuḍ-agi yeḍfer iseggasen n ussuter sɣur wid yesseqdacen tamaziɣt deg internet d yimeɣnasen n tmaziɣt. 

Ayen yessefraḥen daɣen d afran n temɛemrit d tfinaɣ. Tamɛemrit, tira i d aɣ-d-yeǧǧa Dda Lmulud, d tin i sseqdacen tuget n yizzayriyen yernu d tin ara aɣ-yeǧǧen ad nekcem taɣult tumḍint (domaine numérique) mebla uguren. Tifinaɣ, tira n lejdud d umezruy, d tin yextar daɣen Usinag Ageldan n Tussna Tamaziɣt (IRCAM) n Lmerruk.

Neẓra merra belli ma nebɣa Tamaziɣt ad tidir d ad tennerni ilaq-as ad tekcem ɣer taɣult tumḍint. Imeɣnasen n tmaziɣt fkan azal ameqran i temsalt-agi. D waymi asuɣel n yifecka illeliyen, asnulfu n yeḍrisen d yismal Web yeṭṭef-d abrid-is. Akken qaren at-zik « Win yebɣan, yettnadi amek. Win yugin yeqar kan ulamek ». Ihi, win yebɣan yezmer seg tura ad yesseqdec iminig ɣef Web Firefox n Mozilla, afecka n tirawt Skype d yifecka nniḍen s tmaziɣt. Yezmer daɣen ad yerzu ɣer Wikipedia i wakken ad iɣer iḍrisen s tmaziɣt.   

Anasiw Gboard n Google yewjed i ussider baṭel deg Play Store (seddaw Android) d App Store (seddaw IOS).

Tira s tmaziɣt deg Google