Uraret Timseɛraq !

Asnas-a, "Timseɛraq", tga-t-id yiwet n terbaɛt n yimnadiyen n Wammas n Unadi deg Tutlayt d Yidles Amaziɣ, yellan deg Bgayet. Iswi-ines d asnerni d usebɣes n wurar-agi n temseɛraq n lejdud, i tturaren yiqbayliyen d yimaziɣen s umata, seg tsuta ɣer tayeḍ, s waṭas n uskasi gar yiɛeggalen n twacult neɣ gar yimeddukal. Asnas-a, deg-s 2000 n temseɛraq yuran s teqbaylit d tefransist. Timseɛraq-a bḍant ɣef semmus n tiɣula yemgarraden : "Allalen", "Amdan d tudert taɣerfant", "Imɣan d wučči", "Amaḍal" d "Iɣersiwen”. S ufran n yiwet seg tiɣula-ya, yessefk ɣef umyurar ad d-yaf aṭas n tririyin i wakken ad iḥelli agmuḍ yelhan. Timseɛraq ḍefrent kraḍ n yiswiren : aswir isehlen (yiwen n yitri), aswir alemmas (sin n yitran) d uswir yuɛren (kraḍ n yitran). Tal tamezzuyt (aɛraḍ) n ferru n umazrar n temseɛraq ad tekfu ma yella tefkiḍ semmus n tririyin ur nelhi ara.