Takadimit n tmaziɣt d asuki !

Seg wayen i d-yenna Mass Si Lhacmi Ɛessad amaray amatu n Usqamu Unnig n Timmuzɣa ass n sed 09 tuber 2021 deg unmager n uɣmis El Moudjahid :  - Takadimit n tmaziɣt d asuki. Sin n yiseggasen seld tinnulfa-ines, ur  tesɛi la tiẓri la tigawt...

• Yewweḍ-d wakud iwakken ad teqleɛ s tidet s tmernit n mraw n yimaslaḍen i d-yegran maca s yisefranen iɣeẓẓanen d ussnanen. Nebɣa tasudut tuzzigt, ala tizemmar ara yilin deg-s.

• Yewweḍ-d daɣen wakud iwakken ad yili usenked n tmaɣant n leqdic mačči kan n tkadimit maca daɣen tin n wammas aɣelnaw asensegmi d utlayan i uselmed n tmaziɣt (CNPLET) akked tin n semmus n yisudayen n tutlayt d yidles amaziɣ imi yella wugur deg usefrek n kra n tsuda-ya.

• Asqamu Unnig n Timmuzɣa yefren tira s yisekkilen n tlatinit i teɣẓinin titwilanin maca ur yelli ara mgal isekkilen-nniḍen. Yessefk ad nḍerref tasnakta. Ɣer sdat, d annar, imura d yimeɣriyen, ara yefrun taluft-a.

• Yessefk ad d-naf tifrat i taluft n uselmed anufran n tmaziɣt deg uɣerbaz. Merra tenga d timaranin ala tamaziɣt ! Ar melmi ? Tamaziɣt mačči d tutlayt n yiwet n temnaḍt kan, maca n medden merra.

• Yessefk ad d-yili ubeddel n kra n yimagraden n usaḍuf n uwelleh aɣurbiz n 2008 ladɣa amagrad wis 34 ur yemtawan ara d tmenḍawt tamaynut. Nura tabrat i uneɣlaf amezwaru d uselway n tegduda ɣef taluft-a.

• Ad d-tili tuɣalin ɣer leqdic n tesmilt tamasayt gar Usqamu Unnig n Timmuzɣa d uɣlif n usegmi aɣelnaw deg waggur n wamber.

• Asileɣ n yiselmaden iɛedda seg 233 deg 1995 ar 3250 ass-a maca yella ugellel i ilaq ad neqḍeɛ. Llan 1431 n yiselmaden deg ulmud amenzu, 1218 deg ulemmas d 601 deg usinaw. 

------------------------------

Asuki : jachère, friche 

Anmager : forum

Imaslaḍen : membres

Isefranen iɣeẓẓanen d ussnanen : critères rigoureux et scientifiques

Tasudut tuzzigt : institution spécialisée

Tizemmar : compétences

Asenked : présentation

Tamaɣant : bilan

Isudayen : instituts

Asefrek : gestion

Tiɣẓinin titwilanin : raisons techniques 

Tasnakta : idéologie

Anufran : facultatif

Tenga : matières

Timaranin : obligatoires

Tasmilt tamasayt : commission mixte

Agellel : retard