Angal s tririt taruradt (Quick Response code – QR code)

D acu-t ? Angal s tririt taruradt d angal s yifeggagen (code à barres) yesɛan snat n tsektiwin.  Yezmer ad issiweḍ aṭas n tneḍwa n telɣa ara nɣer s tɣawla s ufraḍ n tkamra d usnas...

Angal s tririt taruradt yesnulfa-t-id Masahiro Hara, ajenyur n termist Denso-Wave n tmurt n Japon, deg 1994 i uḍfar n uɣaras n tsiway n ubeddel deg yinukan n Toyota.

I wacu-t ?

Aseqdec yeggten n wangal s tririt taruradt d wa :

•   Tansa URL : iteldi asmel web deg yiminig

•   Takarḍa n terzi (vCard) : irennu anermis amaynut 

•   Asideg arakal : yesskanay-d adeg ɣef Google Maps

•   Aḍris : ibeqqeḍ aḍris  

•   Izen aliktrunan : yetceyyiɛ izen aliktrunan (Emayl) 

•   SMS : yetceyyiɛ SMS  

•   WiFi : yetcuddu ɣer uẓeṭṭa WIFI

•   Bitcoin : yetceyyiɛ tadrimt tawgelhant

•   Twitter : assaɣ ɣer Twitter 

•   Facebook : assaɣ ɣer usebter Facebook

•   PDF : izeddem afaylu PDF 

•   MP3 : yetturar afaylu MP3 

•   App Store : iteldi asnas deg App Store 

•   Tugna : ibeqqeḍ tugna

Amek i iga ?

Angal s tririt taruradt d tamentilt deg wudlif amkuẓan. Amkuẓ-a deg-s igazen d yijerriden s uberkan d umellal. Angal s tririt taruradt deg-s sin n yiferdisen : 

1.  Kraḍ n yimkuẓen deg tɣemmar i ufraḍ

2. Angal d tririt taruradt s timmad-is deg-s tilɣa.

Amek ara t-nesseqdec ?

Nezmer ad nesseqdec angal s tririt taruradt s usawal n ufus (tiliɣri tuḥrict), s tfelwit taliktrunant neɣ s uselkim akked usnas ara iferḍen angal-nni deg kuẓẓ n yisurifen : 

1.  Wehhi takamra ɣer wangal s tririt tarurardt

2.  Freḍ neɣ ssewlef angal s tririt tarurardt

3.  Asnas ad yefru angal s tririt tarurardt

4.  Asnas ad iselkem angal s tririt tarurardt 

Anwi i d isnasen yelhan i wangalen s tririt taruradt ?

Isnasen yelhan d wid war adellel, deg-sen tiwuriwin n tɣellist akked fessus-it i useqdec. Llan aṭas deg Google Play Store neɣ deg App Store. Nefren-d kra deg-sen.

Seddaw Android

•  QR Code Reader and Scanner (Kaspersky Lab) 

•  Barcode Scanner (ZXing Team) 

Seddaw iOS

•  Asnas takamra n iPhone (Apple) : seg iOS 11, asnas takamra n deffir n iPhone tezmer ad tɣer angalen s tririt taruradt. 

•  SwiftScan (Maple Media)

Amek ara d-nesnulfu angal s tririt taruradt ?

•  Nezmer ad d-nesnulfu angal s tririt taruradt s yisnasen neɣ deg yismal web. Ad nefren iswi syin ad nessekcem tilɣa. Nezmer ad nekles angal i d-neslufa deg ufaylu tugna s talɣa .jpeg neɣ .png. Syin ad t-nebḍu d wiyaḍ ɣef yiselsa, deg udlis, deg Messenger, deg Facebook… 

•   Amedya : Angal-a s tririt taruradt nesnulfa-t-id deg usmel web Unitag.fr.Iteldi asmel web Tala uMaziɣ deg yiminig.   

•  Asmel web Qrcode-monkey yelha daɣen i usnulfu n yingalen s tririt taruradt.

•  Angal s tririt taruradt yezmer ad yili d aglugal, ur nezmir ara ad nbeddel talɣut i d-yeddan deg-s. Yezmer daɣen ad yili d asmussan, wagi nezmer ad nbeddel talɣut i d-yeddan deg-s.

-----------------------------------------------------------------------------------

Angal : code ; Taruradt : rapide ; Ifeggagen : barres ; Tisektiwin : dimensions ; Tineḍwa : variétés ; Tilɣa : informations ; Afraḍ : scan ; Takamra : Caméra ; Asnas : application ; Tarmist : entreprise ; Aɣaras : chemin ; Tisiway n ubeddel : pièces de rechange ; Inukan : usines ; Asmel : site ; Anermis : contact ; Arakal : géographique ; Beqqeḍ : afficher ; Tamentilt : motif ; Udlif : graphe ;  Tawgelhant : cryptée ; Iferdisen : éléments ; Tiliɣri tuḥrict : smartphone ; Tafelwit : tablette ; Aselkim : ordinateur ; Freḍ : scanner ; Ssewlef : photographier ;  Fru : traiter ; Selkem : exécuter ; Tiwuriwin : fonctions ; Taɣellist : sécurité ; Kles : enregistrer ; Aglugal : statique ; Asmussan : dynamique.