Timlilit tussnant tagraɣlant ɣef Matub Lwennas

Ilmend n usmekti n umulli wis 20 n tmenɣiwt n umedyaz d ucennay neɣ anaẓur aqbayli amḥaddi Lwennas Matub, thegga-d tesdawit n Abderraḥman Mira n Bgayet yiwet n temlilit tussnant tagraɣlant, ara yeddun ɣef teɣzi n tlata wussan-agi : ttlata 19, larebɛa 20 akked lexmis 21 deg waggur n yunyu i d-iteddun…

 D timlilit ara d-yawin awal ɣef tudert neɣ tameddurt n Lwennas Matub, gar tnagiyin d temsal yerzan timeɣnest-ines ɣef tmagit d yidles amaziɣ akked yizerfan n umdan. Ad ilin daɣen yisaragen ɣef tmedyazt-is d yisefra-s, ama s tezrawin n unadi neɣ s tselḍin n yimussnawen n tmedyazt. Am wakken diɣ ara d-ilin yisaragen ɣef uẓawan akked ccna n uḥeddad n wawal-agi aqbayli, yefkan tudert-is d yiman-is d asfel ɣef tmurt n Leqbayel. D tasga n tutlayt d yidles n tmaziɣt akked tmezdayt n tsekliwin d tulayin n tesdawit n Bgayet i d idisan i d-isuddsen n temlilit-agi tameqqrant ara dyilin deg Tzeqqa n yisaragen n tesdawit n Abderraḥman Mira n lwilaya n Bgayet, deg tesdawit yettwasnen s yisem n Aboudaou. 

Ad yili uceggeɛ n yizwal n teywalin d yigzulen n yisaragen n wid yebɣan ad ttekkin deg temlilit-a, ɣer tensa-agi : timlilit.tussnant@gmail.com uqbel 21 deg waggur n yebrir 2018. Ad tili tririt ɣef teywalin-agi sɣur tesqamut tussnant n temlilit-agi, ass n 30 yebrir 2018. 

Gar wid ara yilin deg usqamu ussnan, ad naf tuget deg-sen d iselmaden deg tesdawiyin n tmurt n Lezzayer, gar-asen Kamel Bouamara, Allaoua Rabehi, Mohammed Djellaoui, Mohand Akli Salhi...atg. Llan daɣen yiselmaden n tesdawin n tmura tiberraniyin, gar-asen: Kamel Nait Zerrad, Tassadit Yacine, El Husscina Farhad...atg. Aṭas n yiselmaden n tesga d tutayt d yidles amaziɣ i d-yellan s deffir n usuddes n temlilit-agi tagraɣlant, am waken daɣen i tettekki Massa Lynda Ouatah, s yisem-is d aɣella n tesga-agi. Ma d iswi n temlilit-agi, ɣef wakken i t-id-nnan yimsuddsen-agi deg wulɣu-nni n temlilit-a, ad yili d asissen iwatan ɣef wayen akk i d-yefka d wayen i d-yeǧǧa Matub ama d tamedyazt, ama d aẓawan ama d isental iɣef yessefra akked talɣiwin swayes yessefra...atg. D tagnit ara d-isddukklen imussnawen d yiselmaden d wid akk iḥemmlen Lwennas, d tagnit daɣen n tmussni d tussna, imi ad yili ubeddel n tmuɣliwin d tmussniwin ɣef urgaz-agi ameqqran.

A. A. – Aɣmis n yimaziɣen 02-01-2018