Muḥya - D acu-t ssirk-agi.

D acu-t ssirk-agi

D tiṭ-agi i k-yeẓran

Amek i tebberttaxeḍ ɣef utruṭwar (trottoir)

Amzun d azger deg lbaṭwar (abattoir)

Kečč ur telliḍ d asekran

Bbuq ɣef uxenfuc uhya amek i truḥeḍ

Imsebriden mi k-walan

Nnan-as awit-t ɣer ufarmasyan (pharmacien)

Kečči teggummaḍ ad d-tneṭqeḍ

Puisque temmuteḍ

Yiwen yelsa-d akustim cik (costume chic)

Yenna-yas uh d askeɛrer i yeskeɛrir

Keččini yeqqur ugecrir

Teṭṭfeḍ kan imi-k Puisque iɛedda lqecc-ik

Ijerbuben-ik rkan, ilefḍan, tizuraz a laṭif

Isebbaḍen-ik ttaḍsan

Taḍsa n bessif

Iban kan iban mačči d bu yimelyan

D acu t-yuɣen akka ? Yyaw ad t-nẓer !

Mmɣen fell-ak sin akken ad ak-id-ttin

Dɣa din i fsin

Aɛebbuḍ-ik d azegzaw

Uuh ad nessuget awal diɣen

D acu i k-yenɣan

Ttmesmuqulen lɣaci bu ukustim-nni

Yennah ad as-yini : Xussen kan lexwan

La ilaha illa llah Muḥemmed rasul llah

Hatnan a mmi hatnan

Tura tewweḍ-d labulis (la police)

Kul yiwen s uɛekkaz-nni deg ufus-is

Yenna-yi-d yiwen emci ya ṭṭneh

Tesɛiḍ ẓẓher cwi kan imi temmuteḍ

Wanag teḥrem yemma-k d acu-t ssirk-agi

Ard ɣlin fell-ak alamma tettraḥeḍ

Amek inɛel ddin Rebbi-k dɣa

I tlemmast n lezzayer caylellah

Kullec iceɛceɛ lḥemdullah

Keččini temmureḍseḍ-aneɣ dagi

Si laẓ am uɣerda

D acut uyennat-agi d lmuḥal

Ur tettneḥcameḍ ara keččini

Lanǧiri (L’Algérie) d lǧens yifen akk leǧnas

Ala aɛdaw Rebbi ɣer gma-s

I aɣ-ikerhen nekni

Ayɣer ur tuɣaleḍ ara d diriktur (directeur)

Neɣ d lmir (maire) neɣ d kumisar uparti (commissaire de parti)

Ad tesɛuḍ lqahwa neɣ nutil (hôtel) di Pari

Ad tuɣaleḍ d abarbu (barbeau) ɣef yimanik

Keččini seg wasmi i d-tecfiḍ i ddunit-ik

Teqqareḍ-as kan ulac ẓẓher ay aɣyul n wurti

Uuh aha kan bac ad teḍru yid-k akka

Armi d aya i ak-d-yegran

Wissen acḥal n leḥyuḍ i k-d-yerran

Mačči d ayen ara d-neḥku

Ihi Lanǧiri akka !

Iban ɣef wudem-ik iban

Walaɣ kan udem-ik rriɣ-d s lexbar

D acu i k-xedmen wayetma-k inselmen

A wi yeẓran d acu i as-tenniḍ

Mi akken i teɣliḍ mi tewḍeḍ ɣer d ulaqrar

Ahat twalaḍ iman-ik

Asmi telliḍ d amecṭuḥ d aqcic amecṭiṭuḥ

Baba-k yettaǧǧa ccɣel-is yettawi-k ɣef yiɣil-is

Yeqqar-ak mimi tituḥ

Asmi i k–tessuṭuḍ yemma-k

Nettat tehbel fell-ak

Teqqar-ak ay akelbun-iw,

A sseɛd-iw a rrebḥ-iw a tafat-iw

Mi tberdeḍ iman-ik

Ad ak-tini ad tɛezzi tara-k

Amek i k-tessudun amek i k-tettḥewwi

Cteddu ad timɣureḍ ad tizwiɣeḍ ad timluleḍ

Ad tifeḍ kra ideg tluleḍ amek i k-teskikiḍ

Amek i k-tezzuzun amek amek….

Mačči terwi

Ah a lukan ad ak-id-twali dagi temɣart n yemma-k

Mačči ad tewwet agejdur

A mmi yemmuten a mmi a mmi ɛzizen

Kelfeɣ-asen Rebbi d kra iɛettbeɣ fell-ak

Tura anda yella wi yeẓran

Ahat tekkreḍ-d kan akka d agujil meskin

La aḥbib la lwali

Tenfeḍ-ik ddunit teṭṭḍeḍ ilili

Ula d win ahat yerka

D ayen tura llah ɣaleb lamer yewweḍ bab-is

Di ddunit-a ɣas tetmeḥneḍ

Aql-ak-id tura teffɣeḍ-tt

Tewwḍeḍ s anda ara naweḍ

Win yebɣan ad iru ad iru ɣef yixef-is

Muqel a mmi amek i k-refden s lemḥadra

Sin sya sin sya

Sin seg yiḍarren sin seg yifassen

Keččini tetteɛluluqeḍ gar-asen

Tenḥerwaḍ tura

Sulin-k ɣef tberwiṭ-nsen ḥmed Rebbi

Twalaḍ tura

lukan d lagrib (la grève) i txedmeḍ

Neɣ d anṭaq i d-tneṭqeḍ

Neɣ d tukerḍa i tukreḍ

Akken ad teččeḍ

Iban (Eh bien) ad tenṭerreḍ

Imi d lmut i temmuteḍ

Iban (Eh bien) ur k-wwiten ara

Lɣaci-nni i d-yezzin walan dayen

Yekfa ssuq tefra rreḥba

Kul wa ikemmel abrid-is a sidi ulbaba

Akka cweyya ciṭuḥ ad ak-ttun

Mačči d kra ad d-ttmektin

Ruḥ win yemmuten

Ad as-yeɛfu Rebbi

Nekka-d seg wakal

I wi (Et oui) mačči menwala kan

Dɣa alamma yeɣra fell-as ccix

Akken ad yawi lbaraka

Anda i k-ɣzan

Nekka-d seg wakal ad nuɣal s akal

A twalem ad d-yas ɣur-k ɛeẓrayen

kečč ad t-tagadeḍ

Si des fois yusa-d ɣur-k ɛeẓrayen

Ad ak-iḥaseb d lfeɛl-ik

I leɛnaya n ddnub-ik

Ḥader ad as-tiniḍ amek temmuteḍ

Ad ak-d-yini ansi i d-tekkiḍ

Fiḥel ad as-tiniḍ

Si lezzayer n lbext-iw

Mačči akken i tt-in-teǧǧiḍ

Wali iẓerman-iw

Yekker deg-sen uwekkiw

Asmi meẓẓiyeɣ xedmeɣ

Ɛettbeɣ swan tidi-w

Ala ayen ččan medden

Asmi i meqqreɣ cabeɣ

Teɣli tezmert-iw seddan-iyi d ufriḍen

Acḥal iwumi nniɣ

Fket-iyi ulamma d tiqqit n waman

I wudem Rebbi

Nnan-iyi selli ɣef nnbi

Ɣennan-iyi-d « Qasamen »

Seg tesfift tis kraḍ n Muḥya i d-yefɣen deg yunyu 1979

(Berceuse pour un pas-de-chance - Poésie de Jehan Rictus)