Tira tasidfant - Ecriture inclusive

Taggara-ya, yella-d uskasi meqqren deg tmurt n Fransa ɣef tira tasidfant, tira ur yessemgarraden ara gar urgaz (amalay ; awtem) d tmeṭṭut (unti ; tawtemt). Akken neẓra merra « amalay yerna unti » deg tira n tefransist.  Wid yellan sdeffir taluft-a qqaren-d belli iswi-nsen d asnerni n tulut (amɛadal) gar urgaz d tmeṭṭut, ttaken-d amedya n tefyirt yessewhamen « Le ministre est enceinte. ». Bɣan ad beddlen ilugan n tira, fkan-d semmus n yisumar igejdanen...

• Assekcem ɣer umawal n wunti n yismawen n temras, isellunen, tazzulin d yizwal. Imedyaten : « autrice » neɣ « auteure », « professeuse » neɣ « professeure », « chercheuse» neɣ « chercheure ». 
• Aseqdec n wunti d umalay s usmiwer n umizzwer angemmay. Imedyaten : « elles et ils », « tous les Acadiens, toutes les Acadiennes », « celles et ceux ». Snulfan-d ula d iwalnuten. Imedyaten : « iels » (« elles/ils »), « toustes » (« tous/toutes »), « ceulles » neɣ « celleux » (« celles/ceux »), neɣ « elleux » (« elles/eux »). 
• Asemres uɣẓin n wagaz anammas. Imedyaten « ingénieur·es, historien·nes, sénior·es ».  Smenyifen agaz anammas deg wadeg n tacciwin i ittaran unti d awennit usin.  
• Aseqdec n yirman ismuddiren ur yettbeddilen ara talɣa gar umalay d wunti. Imedyaten : « artiste, cadre, membre ».
• Aḍerref n yismawen inamayen « Femme » d « Homme ». Imedyaten : « Les droits humains » deg wadeg n « Les droits de l’Homme », « La journée des droits des femmes » deg wadeg n « La journée de la Femme ».

Agaz anammas ur yella ara deg unasiw unnim. Seddaw Windows, ad t-id-nḥelli s tuddsa Alt+0183. 

Seddaw Mac OS X, ad t-id-nḥelli s tuddsa Alt + Maj + F.

Seg tama-nsen, wid yellan mgal tira-ya, qqaren :

• D taluft tusint
• Amalay d awsiyan, yerza tilawin d yirgazen 
• D tira icemten “Écrivaine”, “pompière”
• D ayen ara yeswiɣen tutlayt
• D tira yettwagedlen sɣur unabaḍ d tkadimit  

Ma yella nezzi-d ɣer tmaziɣt, ɣas taluft-a urɛad d-tewwiḍ ɣur-neɣ, ad d-nefk kra n wannayen :

• Deg tmaziɣt, tawsit d awalec, d asmil n tjerrumt acku amalay d wunti mgarraden deg talɣa d unamek. Deg talɣa, ad nḥelli unti seg umalay s tmerna n « t » ɣer tazwara d taggara n yisem. Deg unamek, ad d-nawi awal kan mi ara yili assaɣ gar umalay d wunti d assaɣ n tuzzuft (awtem / tawtemt) acku llan wassaɣen-nniḍen.

• Deg « Tjerrumt tatrart n teqbaylit », ma yella llant snat n tewsatin (amalay d wunti) deg tefyirt, ad nessefti amyag ɣer wudem amalay. Amedya : « Argaz d yelli-s leḥḥun ». 

• Nesseqdac aṭas amalay awsiyan i irzan tilawin d yirgazen. Amedya : Deg tefyirt « Wissen ma tweǧdem i tira tasidfant ? », nesteqsay irgazen d tlawin.

• Ur nesɛi ara ugur n yismawen n temras, isellunen, tazzulin d yizwal. Imedyaten : Ameskar, Tameskart ; Aselmad, Taselmadt ; Amnadi, Tamnadit ; Amaru, Tamarut ; Asexsay, Tasexsayt.

• Nettaru yakan « Izerfan n umdan », nezmer ad naru « Izerfan ilsanen ».

• Kra sseqdacen tacciwin mi ara d-arun « Azul fell-awen(t) » ; « Tanemmirt-nwen(t) ». Ahat tif ma yella nesseqdec agaz anammas akka : « Azul fell-awen·t » ; « Tanemmirt-nwen·t ».

• Llan yimqimen irawsanen i nezmer ad nesseqdec : « wi » deg wadeg n (wa, wi ; ta, ti) akked « ayen » deg wadeg n (win, wid ; tin, tid).

• Yezmer urgaz ad d-yini tagi d taluft tusint maca yessefk ad neǧǧ tilawin ad fkent timuɣliwin-nsent deg taluft-a imi akken neqqar deg yinzi « Ala win i ikerzen i iẓran akal amek iga. ».

• Ahat taluft-a tuklal ad tili d asentel n tezrawt deg tesdawit.

-----------------------------------------------

Tasidfant : inclusive ; Tulut : égalité ; Isumar : propositions ; Timras : emplois ; Isellunen : grades ; Tazzulin : métiers ; Izwal : titres ; Asmiwer : énumération ; Amizzwer angemmay : ordre alphabétique ; Uɣẓin : raisonné ; Agaz anammas : point médian ; Tacciwin : parenthèses ; Awennit usin : propos secondaire ; Irman ismuddiren : termes épicènes ; Inamayen : communs ; Anasiw unnim : clavier courant ; Tuddsa : combinaison ; Awsiyan : générique ; Annayen : observations ; Tawsit : genre ; Awalec : phonème ; Asmil : catégorie ; Assaɣ : relation ; Tuzzuft : sexe ; Irawsanen : neutres.

------------------------------------------------

Iɣbula :

• « Tajerrumt tatrart n teqbaylit » - Kamal Uzerrad
• « Anagraw n yisem » - Ɛellawa Rabḥi
• « Manuel d'écriture inclusive » - Mots-Clés