Tinzaɣ

Tanzeɣt (préposition), d awal n tjerrumt (alɣac - morphème) ur nettbeddil deg talɣa, tetteg assaɣ (relation) gar sin n yismawen deg yiwet n tefyirt neɣ gar yiwen n yisem d tefyirt-nni ya s timmad-is.…

Tanzeɣt, deg tmaziɣt, tettas-d daymen sdat yisem, tettarra-t d asemmad arusrid, ma ɣer useɣru, d asemmad n yisem, ma ɣer yisem-nniḍen ur nelli d aseɣru. Daymi as-qqaren d awura (fonctionnel) : yettak tawuri (fonction) i yisem.

"Tinzaɣ" s talɣa PDF

Llant tenzaɣ i yettbeddilen addad i yisem, ttarrant-t deg waddad amaruz. Iwakken ad tizmir tenzeɣt ad tesseḍfer isem deg waddad amaruz, yessefk :

(1) ad tili seg tenzaɣ i yesseḍfaren isem deg waddad amaruz (acku, llant tiden ur nettbeddil addad i yisem i d-grent), 

(2) ad yili yisem i d-tger tenzeɣt-nni seg yismawen i ilan addad (ila addad ilelli, ila addad amaruz). 

Isem, deg waddad ilelli deffir tenzeɣt ma :

(1) tanzeɣt-nni ur seg tiden i yesseḍfaren isem deg waddad amaruz, 

(2) isem i terza taluft ur seg yismawen i ilan addad.

Yella wayen i wimi nezmer ad nsemmi da uddus unziɣ (syntagme spirant) : d uddus i yebnan s tenzeɣt akked yisem neɣ d umernu. Tanzeɣt-nni, da, tettarra uddus i terza taluft ila azal n tenzeɣt. Amedya : deg tefyirt Yemmug anect n yilu., anect n, d uddus unziɣ, ila azal n tenzeɣt.