netoops blog
>>> Bienvenue ! Ansuf Yis-wen ! ⴰⵏⵙⵓⴼ ⵢⵉⵙ-ⵡⴻⵏ <<< Tamaziɣt, tella, ad tili, ass-a, azekka... i lebda ! <<< Deg webrid n Dda Lmulud, negzem (awi yufan ad tilim s yidis-nneɣ) macci kan ad neḥrez tutlayt d wedles n yimaziɣen s umata maca ad aten-nesnerni.
I kečč a Lwennas. Ma ara ṭṭlam yesseblaɛ tafat s uslifeẓ n ticurkeḍt d nḥeddeṛ s terẓeg i uleqqem imciṭen n tmagit tagimseggast, syin amyi yettuɣal d tilawt. Imcumen-agi tteḥqaren-aɣ yal taswiɛt. Nugi ad neknu. Aleqqem yugi ad yaɣ segmi iɛuraf ṭerḍiqen s urured n tuddert yettwaxnaqen. Ur nesteɛfuy ara alama nedder d yiman-nneɣ d ḥebsen imerawen-nneɣ aneqleb deg iẓẓekwan-nsen. Tabawt tesfqaɛ-aɣ alama teglad s lmut. Tinififtin n ẓẓif-nneɣ ttwamerretent. Maɛtub Lwennas, tcennuḍ s ubeɛzeq ayen ḥulfan atmaten-ik s tsusmi. Immi nella d tiɣtas n yiwen unagraw anda awal tilleli yesɛa anamek : tilleli i kra n yemdanen ad melken wiyaḍ. Kečč d aselɣar i wul yettwarzen. D anza yeddren n lebɣi-nneɣ ad neqqim nbedd. Ccna yekka-d seg ẓẓif-inek, taɣuct-ik i icuffen s zzɛaf d wurfan teseḥmay-aɣ iɣsan. ---------- Nettxayal Tawes Amruc d umeṭṭraḍ anumidi mi tzegger igenwan n tmurt-nneɣ. Syin akin ticraḍ n tyemmatin-nneɣ ttuɣalent d tidet tamagdezt. Ulac ayen nniḍen yessnen neɣ izemren aɣ-yenher. Lwennas, tesmektiḍ-aɣ-d s tumert belli ɣas uzlen idamen, aẓar yettwaxlaf. Ulac alugen n ugama yugaren wagi. Aḥaweṣ n tlelli-nneɣ sɣur imesḥaf-agi i ɣ-iḥekmen yerra aɣref-nneɣ amzun ttaqeḍɛit n lmal yuḍnen anda wid iffazen ɛaṛqen, ussafen neɣ ttwarnan, wid menwala uɣen taggamaḍt n yitran yettcririqen. Rru a yul. Ccnu-yasen a Lwennas belli tugdut d aram amezwaru deg imawen-nneɣ, neṭṭeḍ-itt seg yidmaren n tyemmatin-nneɣ. Ccnu-yasen fud-nneɣ n teɣdemt d weɣram. Ccnu, a Lwennas, ccnu ! Ɛni amedyaz yezmer ad yemet ?

dimanche 16 juillet 2017

Lemɛinṣla neɣ Lɛinṣla : Ansay aqbur n tfellaḥt

Lemɛinesla d ansay aqdim, ila assaɣ d tfellaḥt. Xeddmen-t medden ass n 24 di yunyu deg uwitay n Yimaziɣen. Semɛinsilen medden mi tfukk tmegra akked uxeddim n lexlawi. Imir d tallit n tiwwin n yigumma (lfakya) am tbexsisin d tẓurin...

Tanezzayt (ṣṣbaḥ), ad d-kkren, ad siɣen times, ad gren ɣer tmes-nni ticcicin (zbel yekkawen) i wakken ur ttafgen ara yifeṭṭiwjen. Tikwal daɣen ggaren taqeṭṭiḍt n tseṭṭa (tajeḥniḍt) n yikerri n lɛid. Times, saɣayen-tt ddaw yisekla i d-yettakken igumma am tneqlin d tfeṛṛant. ɣef wakken i d-qqaren, abbu-nni (dexxan) deg-s ddwa : yettḥarab ɣef yigumma, ur d-ɣellin ara d aɣiɣa, yernu isuffuɣ-asen ibeɛɛac ma kecmen ɣer daxel-nsen. Ttḍeggiren daɣen medden aɣebbar ɣef yifurkawen. Mi ara tttḍeggiren, qqaren-as :

Ay aḥnin, ay ajebbar
A win ixelqen letmaṛ
Ttif aɣebbar ddekkar
Lɣella-inu ad tetmeṛ
Ayen iketben ur yeṭṭar


Di kra n temnaḍin, d timexḍa, deg yinurar d usuki ay saɣayen medden times mi yeɣli yiṭij. Ass n wass-a, times-agi n yinurar d usuki d aktay kan i d-yeggran deg-s. D imɣaren kan i as-id-yecfan. Qqaren belli mi tuɣ tmes-nni, ad zeggren fell-as yigerdan, ad ttreḥḥilen, ad as-qqaren :

A lemɛinesla kkes leḥfa.

Qqaren daɣen :

Ass-agi d lemɛinesla
Ur aɣ-tettaɣ tawla
ɣef tidet ters tlaba
Lwil yerwel s aẓekka.

Deg wass n Lemɛinesla, yegdel uxeddim ɣef medden. Qqaren ur ilaq ara ad innal umdan imenda (irden...) ma ulac ad ten-yekcem uferṭeṭṭu. Tilawin, ur ilaq ara ad xedment taduṭ ma ulac ad aḍnent zzellum, ad tent-qerḥent lḥekkat-nsent (lemfaṣel). Maca, xas akken yegdel uxeddim, llant tuddar i yettfaṛasen tagnit, imi stufan yimdanen, ttagan ticemliyin (aqqedic n taddart) : ferrsen tiliwa d tmeqbar.

Deg wayen iɛnan tagella (učči), ur yelli kra i d-sewwayen medden i lmend n wass n Lemɛinesla. D acu kan wid ilan azemmur d testan (lmal), sefsayen, ass-nni, udi ay jemɛen d tiwurac kra tekka tefsut. Ttaggaden medden ma yefsi wudi-nsen uqbel Lemɛinesla, ad inqedwi uyefki aṛexsas si tmaẓẓagt n tfunast-nsen. Ad teṭṭef temɣart n uxxam tiwurac n wudi, ad tent-tsefsi ɣef tmes ; dɣa seg wass-nni d asawen, yewjed wudi-nni i wučči. Yella melmi, ass-nni kan dɣa n Lemɛinesla i tetten yis-s acewwaḍ. Mi i d-yeḥder ad ččen tiremt-nsen, qqaren-as :

Ass-a, d Lemɛinesla 
Acewwaḍ d wudi, yella. 

Di kra n temnaḍin, seg wakken ttarran azal meqqren i wass n Lemɛinesla, xeddmen-as timecreḍt.

Seg « LE RITUEL AGRAIRE » n H.GENEVOIS (s tefransist)
Tasuqqilt sɣur R. ƐACUR

Aucun commentaire :

Enregistrer un commentaire