netoops blog
>>> Bienvenue ! Ansuf Yis-wen ! ⴰⵏⵙⵓⴼ ⵢⵉⵙ-ⵡⴻⵏ <<< Tamaziɣt, tella, ad-tili, ass-a, azekka... i-lebda ! <<< Deg webrid n Dda Lmulud, negzem (awi yufan ad tilim s-yidis-nneɣ) macci kan ad-neḥrez tutlayt d wedles n yimaziɣen s umata maca aten-nesnerni.
I kečč a Lwennas. Mara ṭṭlam yesseblaɛ tafat s uslifeẓ n ticurkeḍt d nḥeddeṛ s terẓeg i uleqqem imciṭen n tmagit tagimseggast, syin amyi yettuɣal d tilawt. Imcumen-agi tteḥqaren-aɣ yal taswiɛt. Nugi aneknu. Aleqqem yugi ad yaɣ segmi iɛuraf ṭerḍiqen s urured n tuddert yettwaxnaqen. Ur nesteɛfuy ara alama nedder d yiman-nneɣ d ḥebsen imerawen-nneɣ aneqleb deg iẓẓekwan-nsen. Tabawt tesfqaɛ-aɣ alama teglad s lmut. Tinififtin n ẓẓif-nneɣ ttwamerretent. Maɛtub Lwennas, tcennuḍ s ubeɛzeq ayen ḥulfan atmaten-ik s tsusmi. Immi nella d tiɣtas n yiwen unagraw anda awal tilleli yesɛa anamek : tilleli i wabɛaḍ ad melken wiyaḍ. Kečč d aselɣar i wul yettwarzen. D anza yeddren n lebɣi-nneɣ ad neqqim nbedd. Ccna yekkad seg ẓẓif-inek, taɣuct-ik i icuffen s zzɛaf d wurfan teseḥmay-aɣ iɣsan. ---------- Nettxayal Tawes Amruc d umeṭṭraḍ anumidi mi tzegger igenwan n tmurt-nneɣ. Syin akin ticraḍ n tyemmatin-nneɣ ttuɣalent d tidet tamagdezt. Ulac ayen nniḍen yessnen neɣ izemren aɣ-yenher. Lwennas, tesmektiḍ-aɣ-d s tumert belli ɣas uzlen idamen, aẓar yettwaxlaf. Ulac alugen n ugama yugaren wagi. Aḥaweṣ n tlelli-nneɣ sɣur imesḥaf-agi i-ɣ-iḥekmen yerra aɣref-nneɣ amzun ttaqeḍɛit n lmal yuḍnen anda wid iffazen ɛaṛqen, ussafen neɣ ttwarnan, wid menwala uɣen taggamaḍt n yitran yettcririqen. Rru a yul. Ccnu-yasen a Lwennas belli tugdut d aram amezwaru deg imawen-nneɣ, neṭṭḍitt seg yidmaren n tyemmatin-nneɣ. Ccnu-yasen fud-nneɣ n teɣdemt d weɣram. Ccnu, a Lwennas, ccnu ! Ɛni amedyaz yezmer ad yemet ?

jeudi 29 juin 2017

Snernit aswir-nwen deg tira !

Deg umagrad-agi awen-d-nbeggen amek ad tesnernim aswir-nwen deg tira. D ayen i isehlen maḍi. Ayagi yebna ɣef kkuẓ n wallalen : asbeddi n unasiw n tmaziɣt, ilugan n tira, taseftit n yemyagen d yimawalen n tmaziɣt…

Allal amezwaru : Anasiw n tira n tmaziɣt



Sbeddet anasiw "Unicode" ɣef uselkim-nwen i wakken ad tarum s tmaziɣt ladɣa isekkilen ẓ ṛ ṭ ɣ ṣ ḍ ǧ ḥ ɛ č Ẓ Ṛ Ṭ Ɣ Ṣ Ḍ Ǧ Ḥ Ɛ Č. Rzut ɣer dagi


Allal wis sin : Ilugan n tira



Nhegga-yawen-id almedẓan mebla asbeddi s daw « Windows » yeɛnan Ilugan n tira n tmaziɣt. Tzemrem ad terrem almedẓan-agi ɣer uselkim-nwen neɣ ɣer tsarut « USB » d ad tnadim deg yilugan n tira melmi i wen-yehwa. Rzut ɣer dagi



Allal wis kraḍ : Taseftit n yemyagen



Taseftit n yemyagen d lsas n tefyirin. Asmel web « amyag.com » akun-iɛiwen nezzeh deg tseftit iwulman n yemyagen. Rzut ɣer dagi


Allal wis kkuẓ : Imawalen n tmaziɣt



Yal yiwen yezmer ad yesbedd  Amawal ameqqran n tmaziɣt deg uselkim-ines ! Ayagi yekkad seg twuri (fonction) n unadi awerman (automatique) deg yal imawalen s umasal (format) PDF mebla ma teldim-ten yiwen yiwen. Teḥwaǧem kan aseɣẓan (logiciel) Acrobat Reader d imawalen s umasal PDF. Walit amek dagi




Amedya - Ttbut


Asnerni n weswir-ines deg tira i win yebɣan mačči d awezɣi neɣ d ayen yuɛren, ha-t-an ttbut :

Win i innumen yettaru akken i isell, akagi :
« Weqbel attegrem asurif, attezewrem nif. Ma wlac Tamazight, wlac wlac wlac… ».
S useqdec n wallalen-agi, ad yesnerni aswir-ines deg tira. Ad yaru am akka :
« Uqbel ad tegrem asurif, ad tzewrem nnif. Ma ulac Tamaziɣt, ulac ulac ulac… ».

Aucun commentaire :

Enregistrer un commentaire