netoops blog
>>> Bienvenue ! Ansuf Yis-wen ! ⴰⵏⵙⵓⴼ ⵢⵉⵙ-ⵡⴻⵏ <<< Tamaziɣt, tella, ad-tili, ass-a, azekka... i-lebda ! <<< Deg webrid n Dda Lmulud, negzem (awi yufan ad tilim s-yidis-nneɣ) macci kan ad-neḥrez tutlayt d wedles n yimaziɣen s umata maca aten-nesnerni.
I kečč a Lwennas. Mara ṭṭlam yesseblaɛ tafat s uslifeẓ n ticurkeḍt d nḥeddeṛ s terẓeg i uleqqem imciṭen n tmagit tagimseggast, syin amyi yettuɣal d tilawt. Imcumen-agi tteḥqaren-aɣ yal taswiɛt. Nugi aneknu. Aleqqem yugi ad yaɣ segmi iɛuraf ṭerḍiqen s urured n tuddert yettwaxnaqen. Ur nesteɛfuy ara alama nedder d yiman-nneɣ d ḥebsen imerawen-nneɣ aneqleb deg iẓẓekwan-nsen. Tabawt tesfqaɛ-aɣ alama teglad s lmut. Tinififtin n ẓẓif-nneɣ ttwamerretent. Maɛtub Lwennas, tcennuḍ s ubeɛzeq ayen ḥulfan atmaten-ik s tsusmi. Immi nella d tiɣtas n yiwen unagraw anda awal tilleli yesɛa anamek : tilleli i wabɛaḍ ad melken wiyaḍ. Kečč d aselɣar i wul yettwarzen. D anza yeddren n lebɣi-nneɣ ad neqqim nbedd. Ccna yekkad seg ẓẓif-inek, taɣuct-ik i icuffen s zzɛaf d wurfan teseḥmay-aɣ iɣsan. ---------- Nettxayal Tawes Amruc d umeṭṭraḍ anumidi mi tzegger igenwan n tmurt-nneɣ. Syin akin ticraḍ n tyemmatin-nneɣ ttuɣalent d tidet tamagdezt. Ulac ayen nniḍen yessnen neɣ izemren aɣ-yenher. Lwennas, tesmektiḍ-aɣ-d s tumert belli ɣas uzlen idamen, aẓar yettwaxlaf. Ulac alugen n ugama yugaren wagi. Aḥaweṣ n tlelli-nneɣ sɣur imesḥaf-agi i-ɣ-iḥekmen yerra aɣref-nneɣ amzun ttaqeḍɛit n lmal yuḍnen anda wid iffazen ɛaṛqen, ussafen neɣ ttwarnan, wid menwala uɣen taggamaḍt n yitran yettcririqen. Rru a yul. Ccnu-yasen a Lwennas belli tugdut d aram amezwaru deg imawen-nneɣ, neṭṭḍitt seg yidmaren n tyemmatin-nneɣ. Ccnu-yasen fud-nneɣ n teɣdemt d weɣram. Ccnu, a Lwennas, ccnu ! Ɛni amedyaz yezmer ad yemet ?

mardi 3 mai 2016

Adlisfus n usemres n tmaziɣt tatrart sɣur Ɛmer Mezdad


Tadlist-a « Cahier d’exercice de Berbère moderne », d ammud n temsirin ttwadment seg wayen i d-ǧǧan Mouloud Mammeri d Madeleine Allain. Ttwefkent deg iseggasen 1992-93 i tsuta tamenzut n inelmaden deg tesdawit n Bgayet, asmi teldi teɣmert n Tmaziɣt. Imir-nni, ur ggiten ara wid isɣarayen…

 Tazwart
« Tadlist-a, d ammud n temsirin. Nefka-tent deg iseggasen 1992-93 i tsuta tamenzut n inelmaden deg tesdawit n Bgayet, asmi teldi teɣmert n Tmaziɣt. Imir-nni, ur ggiten ara wid isɣarayen.
Tuget di tedlist neddem-d seg wayen i d-ǧǧan Mouloud Mammeri, d Madeleine Allain. Dɣa netat tḥeɣra arsufus nni, tefka-yaɣ-d rray-ines d kra n useɣti.

S tarrayt yellan deg isebtaren-a i nura adlis-nneɣ i d-yeffɣen (ungalen, tullizin, Internet) akk d win ara d-yeffɣen sya ɣer sdat. Ihi d asemres i d-nesna tura nnig 40 iseggasen aya. Deg tnuba-nneɣ, netaru akken yura Mouloud Feraoun deg Isefra n Si Mohand. Mi nmed cwiṭ nemlal d wid i ɣ-yemlan, i ɣ-iseɣren, i ɣ-yefkan tidlisin d tesɣunin. Lemziya-nsen ur tetfakka ara fell-aɣ.

Tura ggten iɛebbwajen, d taɣuri n Tmaziɣt i d tafellaḥt-nsen. Nekkni, ɣas am wakken d i ibujaden, ddeqs aya i nesemras tameslayt. Tamuɣli n win ur nella d aɛebbwaj, tezmer ad tawi kra ur twalin widak yezgan reṣsan allaɣ-nsen dinna : ahat temagarrad cwiṭ d tin-nsen ; tikwal, ahat llan wawalen i senyennesren, nekkni nezmer ad ten-nwali deg usemres-nneɣ n yal ass, akken i tyura Pierre Bourdieu. D neta i yennan daɣen : « Kra n waddad n tmeslayt amzun d ssuq anida ara isenz isufar-is winna i t-yetmeslayen »

Deg twinest-a yella wawal « ssuq » : ihi, ayen yeddan d tmeslayt yuɣal d asafar n menwala. Ssuq d tanyilt anida taɣen, snuzuyen. Ma yezmer ad yenz usafar armi ɣur-s azal, ma ur yufa ara win ara t-yaɣen armi d war azal, itusemma ur yeswa ara. Tidet, ssuq ur yezmir ara ad idum ma ulac imarrawen, wid ixeddmen. Ur yezmir ara daɣen ad idum ma ulac wid ara yaɣen, meḥsub wid yeqqaren.

Amyag « aɣ », di tmaziɣt, ggten deg-s inumak. Yezmer ad yaɣ kra wemdan, fiḥel ma senzen-as-t ! Ihi kra n win yeqqaren nezmer ad nini d amsaɣ s timmad-is. Ihi win ara yeɣren tadlist, yuɣ-it, neɣ ahat d netat maḍi i t-yuɣen. » 
Ɛ.M.


Aucun commentaire :

Enregistrer un commentaire